Expressions- எண்ணமும், எழுத்தும்

பீரில் ஊறிய தயிர்வடை

2005-08-09T12:45:00.000-07:00

சாரு நிவேதிதாவின் கோணல் பக்கங்கள் மூன்றாம் தொகுதி வெளியீட்டு விழா குறித்து பத்ரியும், நாரயணும் எழுதியிருக்கிறார்கள்.பத்ரி நல்ல குஷியான கிண்டல் மூடில் இருப்பதால் அவர் பதிவில் எழுதியுள்ளவை கிண்டலாக படிக்கத் தகுந்த வகையில் இருக்கின்றன.

"நான் ஒரு subversive எழுத்தாளன். என்னைப் போன்ற எழுத்தாளர்கள் பல்வேறு நாடுகளில், நாடு கடத்தப்பட்டார்கள் அல்லது சிறையில் அடைக்கப்பட்டார்கள் அல்லது (சில சமயங்களில்) கொல்லவும் பட்டார்கள். ஆனால் நான் எழுதிக்கொண்டிருக்கும் சிறு பத்திரிகைச் சூழலில் இருந்துதான் எனக்கு அச்சுறுத்தல் வந்ததே தவிர இதுவரை அரசு அச்சுறுத்தல் ஏதும் இருந்ததில்லை. காரணம்: என்னைப் பற்றி அரசுக்கோ தமிழ்ச் சமூகத்துக்கோ தெரியாது. 200 பேருக்கு மட்டுமே இலவசமாக அனுப்பப்படும் பத்திரிகையில் எழுதும் ஒருவனைப் பற்றி யார் கவலைப்படப் போகிறார்கள்?"

சாரு தன்னை சப்வேர்ஸிவ்எழுத்தாளர் என்று கூறுவதெல்லாம் மிகையான சுயவிளம்பரம். சாருவின் எழுத்துக்களும் அவர் கிண்டல் செய்யும் தயிர்வடை எழுத்துவகையில்தான் சேரும், குறிப்பாக கோ.ப கட்டுரைகள். என்ன
அவற்றை பீரில் ஊறிய தயிர்வடை எழுத்துக்கள் என்று எடுத்துக் கொள்ளலாம். தயிர்வடை தயிர்வடைதான் பீரில் ஊறினாலும் அது தயிர்வடைதான்.

படியுங்கள், சிரியுங்கள்

2005-08-04T10:21:00.000-07:00

தமிழில் சில வலைப்பதிவாளர்கள் இஸ்லாமும், அறிவியலும் குறித்து பதிவுகளை இட்டு வருகின்றனர். இவைகளில் அவர்கள் கூறும் பல கருத்துக்கள் நகைப்புக்குரியவை. இவர்கள்ஆதாரம் காட்டும் மூலங்களே அப்படித்தான் இருக்கின்றன.

உதாரணமாக இந்த இணைய தளம். இதில் உள்ள கட்டுரைகள் காட்டும் ஆதாரங்கள் நிபுணர்களாலும், அந்தந்த துறைகளில் உள்ள அறிஞர்களாலும் ஆராயப்பட்டு கட்டுரைகளை வெளியிடும் ஜர்னல்களில் (Journal of American Medical Association, Nature, Science, New England Journal of Medicine, Lancent, Science, Social Science and Medicine போன்றவை) வெளியானவை அல்ல.மாறாக இஸ்லாமும் அறிவியலும் குறித்து இஸ்லாமியர்களே எழுதியுள்ள நூல்கள், கட்டுரைகள். இவற்றில் எந்த முறையான ஆதாரமும் தரப்படுவதில்லை. அறிவியல் கண்ணோட்டம் என்ற பெயரில் இஸ்லாம் வலியுறுத்துவதாக இவர்கள் கூறும் பெண்களின் மீதான கட்டுப்பாடுகளும், ஒடுக்குமுறைகளும்தான் முன் வைக்கப்படுகின்றன.

இது போன்றவைகளை முன் வைத்து இஸ்லாமும் அறிவியலும் குறித்து எழுதும் வலைப்பதிவாளர்கள் நமக்கு படித்து வாய்விட்டு சிரிக்க வாய்ப்பளிக்கிறார்கள் என்று அவற்றை படித்து சிரிக்கலாம். அவர்களிடம் வாதிடுவது வீண் , ஏனெனில் அவர்களுக்கு அவர் ஆதாரங்களாக காட்டும் இணையதளங்கள் பிரச்சினைக்குரியவை என்பது புரியவில்லை.எனவே விமர்சித்து பின்னூட்டங்கள் இட்டுப் பயன் ஏதும் இராது.

இவ்வலைப்பதிவுகளை புறக்கணிக்கலாம் அல்லது படித்து விட்டு சிரிக்கலாம். எது உங்கள் விருப்பம்.

இன்னொரு புகைப்படம்

2005-07-05T00:07:00.000-07:00

சிவகுமார் அண்ணாச்சிக்கு அன்புடன் ஒரு பின்னூட்டம்

2005-06-06T12:13:00.000-07:00

அண்ணாச்சி , லீகல் ஆக்ஷ்ன்,சங்கர பாண்டிக்கு எச்சரிகை, ஒருவாரக் கெடு அது இதுன்னு எழுதியிருக்கீங்க, அண்ணன் ஆலோசனை கொடுத்துதான் இப்படியெல்லாம் எழுதுறீங்கன்னு எனக்கு தோணுது. ஏன்னா உங்களுடைய பின்னூட்டத்தில் அவரைத்தானே கன்சல்ட் பண்ணலாம்முன்னுநீங்கதானே எழுதினது. ரொம்ப டென்ஷன் ஆவதிங்க அண்ணாச்சி. அசோகமித்திரன் சார் எழுதினதைப் படிச்சா அல்லது அவர் போட்டவைப் பார்த்தா காட் பீலிங் வந்துறாதா.

பகைவனுக்கு அருள்வாய்ன்னும் பாரதி சொன்னத பத்தி ஞானபீடம் சொன்ன விளக்கத்தை அண்ணாச்சி கேகல்லியா இல்லை மற்ந்திடுச்சா.சரி அண்ணாச்சி இப்ப மாட்டருக்கு வரேன், அசோகமித்திரன் சார் எழுதின கடிதம், அவர் பேரில வெளியான செவ்வி பற்றித்தா
னான் எழுதினேன்.அசோகமித்திரன் சார் சட்டபூர்வமாக நடவடிக்கை எடுக்கணும்ன்னு நான் எழுதலியே அண்ணாச்சி, ஆனா நீங்க் இதில திண்ணை, வெண்னை, விளக்கெண்ணைன்னு ராதா ராமசாமி, அரவிந்தன் நீலகண்டன் அது இதுன்னு எதையாவது பேசி மாட்டருக்கு வராம டபாய்க்கிறீங்க, அப்படி தப்பிதவறி மாட்டருக்கி வந்தா நான் சொல்லதையெல்லாம் பேசி குழப்ப டிரைப் பண்ணுறீங்க, உதார் விடுறீங்கா. டர்ட்டி டிரிக்க்ன்னா என்னன்னு கேட்டிங்கன்னா இதுதான்னு நான் சொல்ல தோதா நீங்க எழுதியிருக்கீங்க.பகுத் தன்யேவாத் சிவகுமார்ஜி. இன்னும் ஏதாவது சாம்பிள் வேணுமின்னா கூச்சப்படாம கேளுங்க அண்ணாச்சி, உங்க ப்லொக்லிருந்தே எடுத்து தரேன்,அப்பதானே உங்களுக்கு ஈசியா புரியும். எனக்கு டிரெயினைப்பிடிக்கணும், வரேன் அண்ணாச்சி.

I am posting this here so that even Mr.Sivakumar deletes this from his blog there is a record.

ஒரு முக்கிய அறிவிப்பு

2005-06-06T11:50:00.000-07:00

தமிழில் எழுதும் வலைப்பதிவாளர்களே, வலைப்பதிவுகளைப் படிக்கும் அன்பர்களே, பின்னூட்டங்கள் இடுபவர்களே உங்களுக்கு ஒரு உண்மையினை இப்போது சொல்லப் போகிறேன். இணையத்தில் இந்த்துவ எதிர்ப்பு, ஜெயகாந்தன் எதிர்ப்பு, அசோகமித்திரன் எதிர்ப்பு போன்றவற்றை நான் பல பெயர்களில் செய்து வருகிறேன். பி.கே. சிவகுமார் என்ற பெயர் தவிர பிற பெயர்களில் இந்த்துவத்துவதை எதிர்த்தும், ஜெயகாந்தன், அசோகமித்திரனை விமர்சித்தும் இணையத்தில் பி.கே,சிவக்குமார் என்ற பெயர் தவிர பிற பெயர்களில் எழுதி வருகிறேன்.

இதில் வெங்கட், தங்கமணி,அருள், சுந்தரவடிவேல், ரோசாவசந்த், பெயரிலி,கார்திக்ராமாஸ், குழலி,ரவி சீனிவாச், டோண்டு,சாரா, பாலாஜி-பாரி,மூக்கன் ஆகிய பெயர்களும் அடங்கும்.

ஆண் பெண் பெயர்கள் தவிர மிருகங்கள் பெயரிலும் இனிப் பதிய உள்ளேன், உ-ம் த தா ந.கொ.சிங்கம். இதைப் பயன்படுத்த ஜெயகாந்தன் அனுமதித்துள்ளார். ஏனெனில் இந்த த.தா.ந.கொ என்பது அவர் பெயரில் வணிகச் சொல்லாக பதிவு செய்யப்பட்டுள்ளது. அவருக்கு என் நன்றிகளும், வணக்கங்களும்.

உங்களை குழப்புவதற்காக நான் ரஜனி ஆதரவு கருத்துக்களை அன்புடன் பாலா, மாயவரத்தான், ரஜனி ராம்கி என்ற பெயரிலும், எழுதுகிறேன். அறிவியல், பெண்ணியம் குறித்து எழுத பயன்படுத்து, பெயர்களில் தேன் துளி, கறுப்பி, பெட்டை, பெண் பெண் மட்டுமே என்ற பெயர்களும் அடங்கும். சுருக்கமாகச் சொன்னால் இணையத்தில் பி.கே. சிவகுமார் என்ற பெயர் தவிர பிற அனைத்து பெயர்களிலும், அனைத்து வலைப்பதிவுகள், இணைய சஞ்சிகைகளில் எழுதுவதும் நான் தான், நானேதான்.

ராதா ராமசாமியும் நானே அரவிந்தன் நீலகண்டன், கோபால் ராஜாராம், துக்காராம், புதிய் மாதவி உட்பட பல பெயர்களை நான் பயன்படுத்துகிறேன்.

பி.கே.சிவகுமாரின் பேசாப் பொருளைப் பேசத் துணிந்தேன் என்ற வலைப்பதிவினைத் தவிர பிற வலைப்பதிவுகளில் எழுதப்படும் கருத்துக்கள் என்னதே, பின்னூட்டங்களும் என்னதே, பி.கே.சிவக்குமார் என்ற பெயரில் ஏதாவது பின்னுட்டம் இருந்தால் அது மட்டும் அவர் எழுதியது என்று கொள்க. அதை அவர் பெயரில் யாராவது இட்டிருந்தால் அது நானில்லை, நானில்லை. அதை எழுதியது அவர்தானா என்பதை அவர்தான் உறுதிப்படுத்த வேண்டும்.

இந்த உண்மையினை எந்த வலைப்பதிவிலும் இடலாம் என்றாலும் உங்களுக்கு இதை தெளிவாக எடுத்துரைக்க விசிதா என்ற பெயரில் எழுதும் வலைப்பதிவில் இடுகிறேன். இதைப் படித்த பிறகாவது சிவகுமார் அண்ணாச்சிக்கு தெளிவு பிறக்கும் என்று எதிர்பார்க்கிறேன்.

விஜய ராஜேந்தரும் தமிழ் பதிப்புலகும்

2005-05-29T11:39:00.000-07:00

இளையராஜாவின் உரையைக் கேட்கலாம் என்று போனால் அது அந்த முகவரியில் இல்லை.சரி என்று இதைக் கொடுத்தால் ஒருவேளை சரியான இணைய முகவரி அல்லது உரை எந்தப் பெயரில் இடப்பட்டுள்ளது என்று தெரியலாம் என்று பார்த்தால் ...... தளத்தில் விற்கப்படும் புத்தகக்ங்களின் அட்டைகளின் ஸ்கேன் செய்யப்பட்ட பிம்பங்கள் உட்பட பல இருந்தன.

இத்தளத்தில் ஒவியங்கள் என்று தேடினால் ஏதும் இல்லை என்று சொல்லப்படும்.ஆனால் இங்கே போனால் 55 ஒவியங்களைக் காணலாம். தொழில் நுட்ப அறிவு அதிகம் உள்ளவர்கள் நோண்டினால் இன்னும் என்னென்ன கிடைக்குமோ.அதற்காக நான் நோண்டச் சொல்கிறேன் என்று எடுத்துக் கொள்ள வேண்டாம்.

சரி விஷயத்திற்கு வருவோம் - புத்தகங்களின் அட்டைகளைப் பார்த்தால் விஜய ராஜேந்தருக்கு பதிப்புலகில் சீடர்கள் அதிகம் என்று தெரிந்தது. பாட்டில் இதயம் என்று வந்தால் ரத்தம் சொட்டச் சொட்ட இதயத்தினைக் காட்டுவாரே அது போல் புத்தகங்களுக்கு அட்டைகளை வடிவமைத்திருக்கிறார்கள்.

உதாரணமாக தலைப்பில் பெண்ணியம் என்று இருந்துவிட்டால் அட்டையில் பெண் படம் இருக்க வேண்டும் என்பதை விதியாக வைத்திருக்கிறார்கள் போலும்.வெள்ளாவி என்று ப்த்தக தலைப்பென்றால் அட்டையில் சலவைச் செய்யப்பட்ட வேட்டி, நேர்முகம் - இணைய விவாதம் என்றால் இன்டெர்னெட் எக்ஸ்புளோரர் , மூன்று டபிள்யுக்கள் அட்டடையில். ரப்பர் என்றால் ஒரு பெண் ரப்பர் மரத்திலிருந்து பால் எடுப்பது, ஆயிரங்கால் மண்டபம என்றால் ஒரு பெரிய அரங்கின் புகைப்படம், கூந்தல் என்றால் கூந்தலுடைய பெண், என் படுக்கையறையில் யாரோ ஒளிந்திருக்கிறார்கள் என்றால் படுக்கை அறையின் ஒவியம் அட்டையில்.

இதையெல்லாம் ராமாபுரத்திலிருந்து நெவார்க்கிற்கு ஆட்டோ அனுப்ப மாட்டார்கள் என்ற தைரியத்தில் எழுதுகிறேன், ஒருவேளை எடிசனிலிருந்து வருமோ :)

அடுத்த கதை மற்றும் திரைப்படம்

2005-05-21T05:51:00.000-07:00

பிரபல சிற்றிதழ் ஒன்றில் வரவிருக்கும் கதையும், ஒளி இயக்குநர் இயக்கவிருக்கும் படத்தின் கதையும் இந்த உண்மைச்சம்பவத்தின் அடிப்படையில் இருக்கலாம் என்று நம்பத்தகுந்த வட்டாரங்கள் தெரிவிக்கின்றன.

ஏற்கனவே ஒரு விளை சிறுகதை சர்சைக்குள்ளாயிருப்பதால் இன்னொரு கதை அதை விட அதிக சர்ச்சைக்குள்ளாக வேண்டும் என்பதால் இந்த சம்பவத்தினை மையமாக் கொண்டு கதை எழுதுவதாக அந்த அழ்கிய எழுத்தாளர் கூறி வருகிறாராம். இதே கருவினைக் கொண்டு அர்த்தசாஸ்திர எழுத்தாளரும் எழுத உள்ளார் என்றும், இரண்டும் ஒரே இதழில் வெளிவரும் என்றும் பேசிக் கொள்கிறார்கள். இதில் பூடகமாக மதம் இடம் பெறும் என்று அழகிய எழுத்தாளர் சொன்னாராம்.அர்த்தசாஸ்திர எழுத்தாளரோ இதே கருவை தன் நடையில் விரிவான வர்ணனைகளுடன் எழுதுவாராம்.

இதற்கிடையில் தன்னுடைய அடுத்த படத்திற்கு இதையே பயன்படுத்துவதாக ஒளி இயக்குந்ர-நடிகர் முடிவு செய்துள்ளாராம். கதைப்படி அவர் முதலில் ஒன்பதாவது வகுப்பு படிக்கும் மாணவராகவும், பின் காதலானகவும், பின் கணவனாகவும் பாத்திரமேற்பாராம்.

இதை அடிப்படையாகக் கொண்டு புதிய கோலங்கள் என்று தொலைக்காட்சித் தொட்ர் ஒன்று தயாரிக்க்படுகிறது என்று சின்னத்திரை வட்டாரங்கள் தெரிவிக்கின்றன.

இறுதியாகக் கிடைத்த தகவலின் படி வல்லவன் நடிகரும் இதை கருவாகக் கொண்டு படம் எடுக்க உள்ளதாகவும், அதில் ஒன்றுக்கு மூன்றாக ஆசிரியைகள் இருப்பார்கள் என்றும் கோலிவுட் பட்சிகள் கூறுகின்றன.

இரண்டு மாமேதைகள்

2005-02-25T10:01:00.000-08:00

ஐன்ஸ்டீன், கோடேல் குறித்த ஒரு சுவாரசியமான கட்டுரை நியுயார்கரில் வெளியாகியுள்ளது.

தேவதாஸ் மனோநிலை

2005-02-20T01:10:00.000-08:00

நாரயண் தன் பதிவில் பலூன் பார்க்கும் பெண்கள் என்ற தலைப்பில் ஒரு சம்பவத்தினையும்,தன் கருத்துக்களையும் எழுதியிருந்தார்.என் கருத்துக்க்ளை அங்கே பதிந்திருந்தாலும் இங்கே சிறிது விரிவாக

1,ஆண்கள் திருமணமான பின் காதலியைப் பிரிந்த சோகத்தில் புலம்பித் திரிவதும், அச்சோகத்தில் கவிதை, கதை எழுதுவதையும் அல்லது குடியில் தங்களை மூழ்கடித்துக்க் கொள்வதையும் தேவதாஸ் மனோநிலை என்கிறேன்

2,இங்கு ஆண்கள் சிலர் அதில் ஒரு சுகமிருப்பதாகக் கருதுவதும். அந்த சோகமே ஒரு சுகம் என்றும்,சோகத்தின் அடிப்படையில் காதல் இருக்கிறது என்றும கருதுவதுண்டு

3,பிரச்சினை என்னவெனில் இப்படிப்பட்ட ஆண்களை திருமணம் செய்து கொண்ட அல்லது திருமணம் செய்து வைக்கப்பட்ட பெண்ணில் மனோநிலை அல்லது அவளது விருப்பு,வெறுப்புகள் கருத்தில் கொள்ளப்படவில்லை.

இன்னும் யோசித்தால் தேவதாஸ் கதையை பெண்கள் கோணத்தில் எழுதிப்பார்த்தால் அது நிச்சயம்வேறாக இருக்கும். காதல், ஆண்-பெண் உணர்வு குறித்த வேறு பல கேள்விகளையும், possessivenessஉண்மையான காதலின் அடையாளமா என்றெல்லாம் கேட்க வேண்டிவரும்.இதையெல்லாம் எழுப்பஇயலாதபடி தேவதாஸ் பிம்பம் கட்டமைக்கப்பட்டுள்ளது.

பலூனை பார்த்த அந்தப் பெண் எந்த உணர்வுடன் பார்த்தாள் என்பது நமக்குத் தெரியாது.நாராயண் முன் வைப்பது ஒரு ஊகமே, நான் எழுதியதும் இன்னொரு ஊகமே.பலூன்கள் எத்தகைய உணர்வுகளை எழுப்பும் என்பதை பட்டியலிட முடியாது. உதாரணமாக ஒரு அசாதாரணமான பலூன் விபத்தில் உயிரிழந்த ஒருவரை நினைவுபடுத்தலாம். அல்லது பலூனில் மேலே சென்று பார்க்கும் விருப்பத்தினைத் தூண்டலாம்.சிலருக்கு பலூன்களை ஆராய்ச்சிகளை நினைவுபடுத்தலாம். யாருக்குத் தெரியும் அந்தப் பெண் மனதில் என்ன உணர்வு எழுந்ததென்று. நாரயண் அவர்கள் கணவன் - மனைவி என்கிறார். அப்படித்தான் இருக்கவேண்டும் என்று கட்டாயமில்லை.அந்தக் குழந்தை அந்தப் பெண்ணின் குழந்தையாகத்தான் இருக்க வேண்டுமா என்ன.பரபரப்பான சாலையில் ஒரிரு நிமிடத்தில் பார்த்ததை வைத்து ஒரளவே யூகிக்க முடியும்.

ஒருவர் தன் எண்ணத்தினை வெளிப்படுத்துவதை சறுக்கல் என்று ஒட்டுமொத்தமாகக் கூற முடியாது.ஏனெனில் சறுக்கினாலும் அதை சாமர்த்தியமாய் வார்த்தைகள் கொண்டு மறைக்க முடியும். வேறு சிலகேள்விகளும் பின்னோட்டங்களில் எழுந்துள்ளன. அவை குறித்து பின்னர் எழுதுகிறேன்.

சைபார்க் பிரகடனம்

2005-01-23T16:19:00.000-08:00

சோசலிஸ்ட் ரிவ்யுவில் முதலில் 1985ல் வெளியாகி பின் டானா ஹாராவேயின் கட்டுரைகள் தொகுப்பான Simians, Cyborgs and Women: The Reinvention of Nature (New York; Routledge, 1991) ல் இடம் பெற்ற A Cyborg Manifesto: Science, Technology, and Socialist-Feminism in the Late Twentieth Century என்ற கட்டுரை மிகவும் பிரபலமானது.

நான் என்னை சைபார்க் ஆக கருதுகிறேன் என்ற எழுதிய போது அதை இக்கட்டுரையின் பிண்ணனியில் புரிந்து கொள்ளவும் என்று எழுதியிருக்க வேண்டும். சைபார்க் என்பதை பலர் புரிந்து கொள்வார்கள் என்ற அனுமானத்தில் எழுதினேன். அது சரியல்ல என்று இப்போது தெரிகிறது.

இன்று அறிவியலின் வரலாறு, கலாச்சார ஆய்வுகள், பெண்ணியம் உட்பட பல துறைகளில் தவிர்க்க முடியாதவை ஹாராவேயின் கட்டுரைகளும், நூற்களும். இக்கட்டுரை முன்வைப்பவற்றை விவாதிக்க தேவையான சொல்லாடல் தமிழில் இல்லை.எனவே தமிழில் இதை மொழிபெயர்ப்பது மிகவும் கடினம்.

திரு.ஞாநி-திரு.மாயவரத்தான்-திண்ணை- ஒரு கடிதம்

2005-01-22T08:37:00.000-08:00

திரு.ஞாநி-திரு.மாயவரத்தான்-திண்ணை- ஒரு கடிதம்

என் கடிதம் திண்ணையில் பிரசுரமாகியுள்ளது, நீக்கங்கள் உண்டு என்ற குறிப்புடன்.திண்ணைக்கு நான் அனுப்பிய கடிதம் கீழே தரப்பட்டுள்ளது

திண்ணை ஆசிரியர் குழுவினருக்கு

வணக்கம்.

திரு.ஞாநி அவர்கள் கட்டுரை மீது நான் விமர்சனம் வைத்தது உண்மை.அதை கருத்து குறித்த விவாதமாகவே நான் கருதினேன், இப்போதும் அவ்வாறே கருதுகிறேன். அவர் எழுதியதன் மீதுஎனக்கு கருத்து முரண் மட்டுமே உண்டு, அதில் பிராமண துவேஷத்தினையோ அல்லது தனி நபர் வெறுப்பையோ நான் காணவில்லை.
தாரா அவர்கள் வலைப்பதிவிலும் ஞாநியின் கருத்துக்கள் மீது விமர்சனம் இருக்கிறது. http://siragugal.blogspot.com/2004/12/vs.html
உங்கள் அறிவிப்பில் ஒரு பக்கத்தினை மட்டும் எடுத்துக் கொண்டு எழுதியிருக்கிறீர்கள்.எம்.எஸ். ஐயர்மாமியாக இருந்தார் என்றுதான் நானும் எழுதியிருக்கிறேன்.தாரா எழுதியுள்ளதையும் ஒப்பிட்டுப் பார்க்கவும்இந்த இன்னொரு பக்கத்தினையும் உங்களது,வாசகர்கள் கவனித்திற்கு கொண்டுவர விரும்புகிறேன்.எனவே நான் ஞாநியுடன் முரண்படும் இடங்களை மட்டும் முன்னிறுத்துவது சரியல்ல.விவாதத்தினை ஒட்டுமொத்தமாக புரிந்துகொள்ள வேண்டும். திரு.ஞாநி சம்ஸ்கிருதமயமாக்கல் என்பதை சரியாகப் புரிந்துகொள்ளவில்லை என்றுதான் நான் எழுதியுள்ளேன். தவற்றை திருத்திக் கொள்ளுங்கள் என்று நான் எழுதவில்லை. அவர் கொடுத்த விளக்கம் ஏன் ஏற்புடையதல்ல என்பதையே நான் எழுதியிருக்கிறேன். அவர் தரப்பிலிருந்து நான் எழுதியது சரியல்ல என்றோ அல்லது நான் எழுதியதை அவர் மறுக்கிறார் என்றோ பதில் வராத போது நானாக எதையாவது அனுமானித்துக் கொண்டு எழுத முடியாது.
திரு.அரவிந்தன் நீலகண்டன் சம்ஸ்கிருதமயமாக்கல் குறித்து எழுதியிருக்கிறார்.அதன் மீதும் எனக்கு விமர்சனம் உண்டு. நான் எழுதியதின் மீது விவாதம் கருத்து ரீதியாகவே நடைபெறும், நேரடியாகவோ அல்லது மறைமுககாவோ அது தனி நபர் தாக்குதலாக இருக்க இடமளிக்க மாட்டோம் என்று திண்ணை ஆசிரியர் குழு உறுதி அளித்தால் அது குறித்து நான் எழுத இயலும்.
திரு.ஞாநி அவர்கள் எம்.எஸ், இளையராஜா குறித்து எழுதியதை ஒரு பரந்த பிண்ணனியில்தான் நான் புரிந்து கொள்கிறேன். இது தொடர்புடைய வேறு சிலவற்றையும் என்னால் குறிப்பிட முடியும். இன்று புனிதப் பசுக்கள் என்று எதுவும் இல்லை. ருக்மிணி தேவி ,சத்யஜித் ரே உட்பட பல கலைஞர்களின் பங்களிப்பும், அவர்கள் முன்வைத்த அழகியலும் விவாதிக்கப்படுகின்றன. அஞ்சலிக் குறிப்புகள் வெற்றுப் புகழாரங்களாக இருக்க வேண்டும் என்பது திண்ணை ஆசிரியர் குழுவினரின் எதிர்பார்ப்பெனில் அதை தெரிவித்துவிடல் நலம். திரு.ஞாநி தன் கருத்துக்களை விரிவாக முன் வைத்தால்தான் அவர் என்ன சொல்ல வருகிறார் என்பதுதெளிவாகும். அவர் விரிவாக எழுதுவார் என்று எதிர்பார்க்கிறேன்.
திரு.மாயவரத்தான் எழுதியுள்ளதை புரிந்து கொள்ள முடிகிறது -மனதில் தோன்றும் எண்ணம் ஒன்றாகவும்,அதை எழுத நினைக்கும் போது அது வேறொன்றாகவும், எழுத்தில் இன்னொன்றகாகவும் வெளிப்படுவது.முதியவர்களுக்கு மூளை செயல் திறன் குன்றுவதாலும், வேறு சில நோய்களாலும் ஏற்படும் பிரச்சினைஇது. இளைஞர்/ஞிகளுக்கும், சிறுவர், சிறுமியருக்கும் வேறு சில காரணங்களால் தெளிவாக எழுத இயலாதநிலை ஏற்படும். அதற்கு சிகிச்சைகள் உண்டு. பொதுவாகவே அவர் எழுதுவதில் கருத்துக்கள் கோர்வையாக இல்லாமல் இருப்பதையும், தொடர்பற்று வாக்கியங்கள் இருப்பதையும் யாம் காண்கிறோம். இதற்கு தேவையான சிகிச்சை எடுத்துக் கொண்டால் தெளிவாக, கோர்வையாக எழுத முடியும். அப்படி சிகிச்சை எடுத்துக்கொண்டு அதன் விளைவாக தெளிவாக எழுதும் நிலை வரும் வரை அவர் எழுதுவதை தவிர்ப்பது நல்லது.
விசிதா

i consider myself as a cyborg.so please dont address me as ms. or miss. or mrs.as a cyborg i inhabitate in borders,cross boundaries,and challenge your binary thinking andcategories like male-female,mind-body,reason-passion etc.

http://wichitatamil.blogspot.com

உலகமே

2005-01-01T05:50:00.000-08:00

உலகமே

அனைவருக்கும் என் புத்தாண்டு வாழ்த்துக்கள். தொலைக்காட்சிகளுக்கு எழுத்தாளர்கள் விட்டுள்ள வேண்டுகோளினைப் படித்தேன். அதற்கு எந்த அளவு மதிப்பினை தொலைக்காட்சிகள் தரும் என்று தெரியவில்லை. என் எண்ணங்கள் இங்கே ஒரு கவிதையாக

உலகமே

உலகமே அழியும் போதும்
அன்றும்
உலகத் தொலைக்காட்சிகளில் முதன் முறையாக...
நேற்று வெளியான படத்தில் நடித்த
நடிகையின் பேட்டி
தொலைக்காட்சிகளில் கமல் படம்,ரஜனி படம்
வேண்டுமன்றோ தமிழருக்கு

இழவு வீட்டிலும் வேண்டும்
சினிமா தொடர்ந்து
அது அலற வேண்டும்
இல்லையெனில்
அர்த்தமில்லை மரணத்திற்கு

பிரிய நடிக, நடிகையர் நடித்த
திரைப்பட்ங்களின் சிடி, டிவிடி
அல்லது விடியோ
தினம் பார்க்கும் தொலைக் காட்சித்
தொடரின் பகுதிகளின் விடியோவுடன்
சேர்த்து உடலை புதைக்கவோ
எரிக்கவோ செய்யும்
நாள் இல்லை
வெகு தொலைவில்

வாழ்க தமிழர்
வளர்க அவர்தம்
கலைப்பற்று

மீண்டும்

2004-12-29T15:13:00.000-08:00

புத்தாண்டில் மீண்டும் இவ்வலைப்பதிவு மூலம் உங்களை சந்திக்கிறேன்.
புத்தாண்டு நல்வாழ்த்துக்களுடன் அன்பு வணக்கம் கூறி விடைபெறுவது
விசிதா

மெளனம்

2004-12-29T08:26:00.000-08:00

மெளனம்
வார்த்தைகளின் வெற்றிரைச்சலை
விட கனமானது,
ஆழமானது
என்ன செய்ய முடியும் என்னால்,
எங்கோ தொலைவிலிருந்து கொண்டு
நிதி அனுப்பலாம்
நிச்சயமாய் என்னால் மாண்ட
எந்த உயிரையும் திருப்பிக்
கொணர இயலாது
இயலாமை தரும் வேதனை கொடிது

எங்கோ ஒரு மூலையில் நான்
கண்ணீர் சிந்தலாம்
பல சமயங்களில்
யோசிக்கக் கூட
முடிவதில்லை
இயற்கையின் சீற்றம்
அழித்ததை
நினைத்தால்
நம்பிக்கைகள் எல்லாம்
ஆடுகின்றன
விடைகள் தெரியாத
கேள்விகளுடன்புகுகிறேன்
மீண்டும்
மெளனத்திற்குள்

மீண்டும் என் குரல்
வெளிப்பட சில காலமாகும்
அதுவரை
மெளனமே
என் பதில்
என் மொழி
என் நிலை

இக்கோர இயற்கைச் சீற்றத்தால் பாதிக்கப்பட்ட அனைவருக்கும் என் ஆழ்ந்தஅனுதாபங்கள்.

சக வலைப்பதிவாளர்களே என்னால் உங்கள் வலைப்பதிவுகளைப்படித்தாலும் பின்னூட்டம் எழுத இயலவில்லை, பின்னூட்டம் இடும் மன நிலையில்நான் இல்லை.

உங்கள் அக்கறைகள், நிவாரணத்திற்கு உதவும் செய்கைகள்,ஆலோசனைகள் அனைத்தையும் நான் மதிக்கிறேன்.இரு கரம் கூப்பி உம்மை வணங்குகிறேன்.

குருஷேத்ரம்

2004-12-14T08:44:00.000-08:00

குருஷேத்ரம்

கீதை விளக்க உரைகளால் குழம்பி
அர்ஜுனன் தவிக்கையில்
கண்ணனுக்கோ பதிப்புரிமை பிரச்சினை
அனுமதி பெறாத மலிவு
விலைப் பதிப்புகள்,
ரகசியமாய் படமெடுக்கப்பட்ட
கீதோபதேசம்
தொலைக்காட்சிகளில், குறுந்தகடுகளில்
உலகெங்கும்

நாங்கள் பாண்டவர் நண்பரேன்றாலும்
கெளரவர்எம் விரோதியல்ல என்று
பாண்டவர் நட்பு அணி
இருவரும் என் நண்பர்கள் என
இருவருக்கும் படை வீரர்
அனுப்புவார் ஒருவர்
கெளரவர் நட்பணியோ பாண்டவர் எம் விரோதியல்ல
,கெளரவருக்கு உதவவே
களத்தில் என்கிறது
கட்சி மாறல் போல்
பாண்டவரும் கெளரவரும்
அணி மாறல்கள் சகஜம் ?
இங்கே ஐவர்அங்கே நூறு பேர் தவிர
யார் வேண்டுமானாலும் மாறலாம்
இதில் ஐவரில் ஒருவர்
கட்சி மாறலாம்என வதந்தி

நேரடி ஒளிபரப்பு உரிமை சஞ்சயனுக்கில்லை
எனவே திருதாராஷ்டிரன்
ஈஸ்பின்னை(*) நம்பி
தர்மருக்கோ எது தர்மம்
அதர்மம் எனக் குழப்பம்
ஆலோசனை தரும் வழக்கறிஞர்
குழு சட்டமும் தர்மமும் ஒன்றல்ல
என்றுரைக்க
தர்மர் இன்னும் குழம்ப
மர்மப் புன்னகையுடன்
கண்னன்
முடியாத கூந்தலுடன்
திரெளபதி
ஷாம்பு விளம்பரத்தில்
நடிக்க அழைப்புகள்

கர்ணனுக்குத் தெரியாமல்
கர்ணனை தானம்தர
முயற்சிகள்
தன்னைத் தானே தானம்
கொடுத்துவிட்டேனோஎனத்
திகைக்கும் கர்ணன்
இல்லை உன்னை நீயே
விற்றுவிட்டாய்
என்றொரு குரல்

கொழிக்கிறார் இரு தரப்பாருக்கும்
ஆயுதம் விற்பவர்
களத்திலிறங்காமல்
கன்சல்டண்டாகிவிடலாமா
என்ற யோசனையில் துரோணர்
பீஷ்மருடன் பேரத்தில் சிகண்டி
குருஷேத்ரம்
(பின்)நவீனக்
குருஷேத்ரம்

* ESPN
(பிரமீள் நினைவாக)

திண்ணையில் வெளியான கடிதம்

2004-12-11T10:03:00.000-08:00

http://www.thinnai.com/le1209047.html

கடந்த வாரத் திண்ணையில் ஜோதிர்லதா கிரிஜாவின் இன்னொரு புலம்பல் கட்டுரை. அவருக்கு ஒன்று புரியவில்லை , புகை பிடிப்பது,குடிப்பது போன்றவை தனி நபர் தெரிவுகள்.இதனால் உடல் நலம் கெடும் என்று வேண்டுமானால் சொல்லலாம்.பெண்கள் குடிக்கக் கூடாது என்று சட்டமில்லையே. பெண்கள் குடித்தால் அது ஒழுக்ககேடு என்று அவராக கற்பனை செய்து கொள்கிறார். அதற்கும் பெண்ணுரிமைக்கும் என்ன தொடர்பு. பாலியல் சுதந்திரம், திருமணம் இன்றி சேர்ந்து வாழ்வது இதெல்லாம் அவருக்கு ஒழுக்கக் கேடாகத் தெரிகிறது. பெண்ணுரிமை இயக்கத்திற்கும் இதற்கும் எந்த சம்பந்தமும் கிடையாது என்று சொல்ல இவர் யார். என்னைக் கேட்டால் அவர் குருமூர்த்தியுடன் வேறுபடும் கருத்துக்களை விட, அவர் குருமூர்த்தியுடன் ஒத்துப் போகும் கருத்துக்கள் அதிகம்.இருவருக்கும் அடிப்படைக் கருத்துக்களில் வேறுபாடு இருப்பதாகத் தெரியவில்லை.குடிக்கும் பெண்கள் இழிவான பெண்கள் என்று எழுதுபவர் பேசாமல் காஞ்சி மடத்தில் சேர்ந்தோ அல்லது ஆர்.எஸ்.எஸ். சின் மகளிர் பிரிவில் சேர்ந்தோ "பண்பாட்டைக்" காப்பாற்றலாம். ஸ்வீடனைப் பற்றி குருமூர்த்தி தரும் புள்ளிவிபரம் குறித்துமூலக்கட்டுரையில் என்ன சான்றாதாரம் தரப்பட்டுள்ளது என்பதைப் பார்க்காமல் கருத்துக் கூற விரும்பவில்லை. இந்தியச் சூழலில் பெண்கள் மீதான வன்முறை குறித்து குருமூர்த்தி என்ன எழுதியுள்ளார் என்பதுஎனக்குத் தெரியாது. ஆனால் ஒன்றைச் சொல்ல முடியும், ஸ்வீடன் மனித வளர்ச்சி குறியீட்டு எண்ணில்(Human Development Index) உலகில் முதல் ஐந்து நாடுகளில் ஒன்றாக உள்ளது. அங்கு சமத்துவம்என்பது நடைமுறையில் உள்ளது.எல்லாச் சமூகங்களில் உள்ளது போல் அங்கும் சில பிரச்சினைகள்இருக்கலாம்.அதே சமயம் ஆண்-பெண் சமத்துவம், அனைவருக்கும் கல்வி, சுகாதார வசதி, தனி நபர்உரிமைகள், மனித உரிமைகள் போன்றவற்றில் அது இந்தியாவை விட பல படி முன்னே உள்ளதுஎன்பது உண்மை. ஜோதிர்லதா கிரிஜாவின் போலி பெண்ணுரிமை வாதம் குருமூர்த்தியின் கன்சேர்வேட்டிசத்தின் இன்னொரு வடிவம்தான்.
வேலைவாய்ப்பு உத்தரவாத திட்டம் குறித்த கட்டுரை மிக நன்றாக உள்ளது. மொழிபெயர்ப்பாளருக்குஎன் பாராட்டுகள். இது குறித்து மேலும் சில கட்டுரைகளை திண்ணையில் வெளியிட வேண்டும் என்றுகேட்டுக்கொள்கிறேன். indiatogether இணையதளம், திட்டக்குழு இணையதளம், பொதுவான குறைந்தபட்சத்திட்டம் குறித்த ஆலோசனைக்குழுவின் இணையதளம், எக்கானமிக் அண்ட் பொலிடிக்கல் வீக்லி இணையதளம் - இவற்றில் வேலைவாய்ப்பு, வேலைவாய்ப்பிற்கான உத்தரவாதம், கிராமப்புற வேலைவாய்ப்புத்திட்டங்கள் பற்றி பல கட்டுரைகள் உள்ளன.

ஜோதிர்லதா கிரிஜா கட்டுரைகள் குறித்து ஒரு கடிதம்

2004-12-02T23:16:00.000-08:00

Published in Thinnai http://www.thinnai.com/le12020413.html

ஜோதிர்லதா கிரிஜா குருமூர்த்தி எழுதியதற்கு ஏன் இவ்வளவு முக்கியத்துவத்துவம் தருகிறார்.சோ பெண்ணுரிமைகளை ஏற்காதவர், பெண்ணியம் என்பது அவருக்கு ஏற்புடையது அல்ல என்பதுஅனைவருக்கும் தெரியும். விதவைகளைக் குறித்து குருமூர்த்தி ஒரு பேட்டியில் கூறியுள்ள கருத்துக்களைப் படித்தால் அவர் எவ்வளவு பிற்போக்கு கருத்துடையவர் என்பதைப் புரிந்து கொள்ளலாம். துரதிருஷ்டவசமாக கிரிஜா எழுதுவது குருமூர்த்தியின் கருத்துக்களை முற்றிலுமாக நிராகரிப்பதாக இல்லை. மாறாக அவர் குருமூர்த்தி எழுதுவதில் 50% த்தினை ஏற்பவர் போல் தோன்றுகிறது. பெண்களின் உடை குறித்து கிரிஜா எழுதியுள்ளது வேடிக்கையாக உள்ளது. மேல் நாட்டில் பெண்கள் தட்ப வெப்ப நிலைக்கு ஏற்றபடி, செய்யும் தொழில் மற்றும் சந்தர்ப்பத்திற்கு ஏற்றவாறே உடையணிகின்றனர். வெயில் காலத்தில் அணியும் உடை குளிர் காலத்தில் பொருத்தமாயிராது. விளையாடும் இடத்தில் அணியும் உடைக்கும், அலுவலகத்தில் அணியும் உடையும் ஒன்றாக இருக்க வேண்டியதில்லை. இன்று இந்தியாவிலும் பல பெண்கள் business casualஉடைகளை அணிகிறார்கள். இது பொருத்தமாகவும், செளகரியமாகவும் இருக்கிறது என்று பலர் உணர்வதால் இது பிரபலமாகி வருகிறது. இதை இந்தியாவிலும் அணிய முடியும், அமெரிக்காவிலும் அணிய முடியும். இப்படி தங்களுக்குத் தேவையான, பொருத்தமான, செளகரியமான உடைகளை தேர்ந்தெடுக்கும் உரிமை பெண்களுக்கு கிடையாதா.துப்பட்டா அணிய வேண்டும் என்பதற்காக கிரிஜா கூறும் காரணங்கள் நகைப்புக்குரியவை. நாட்டில் திருடர் பயம் அதிகம், பாதுகாப்பில்லை என்பதற்காக யாரும் பர்ஸ் வைத்துக் கொள்ளக்கூடாது, ரூபாய் நோட்டுக்களைக் கொண்டு செல்லக் கூடாது என்று கூறுவது போலுள்ளது அவர் எழுதியுள்ளது. பிரச்சினை செய்யும் ஆண்களுக்கு சரியான பாடம் கற்பிக்க வேண்டுமே தவிர எல்லாப் பெண்களும் கட்டாயம் துப்பட்டா அணிய வேண்டும் என்று கட்டாயப்படுத்தக் கூடாது. ஆண்களின் கண்ணோட்டத்திலும், மனோபாவங்களிலும் மாற்றம் வரவேண்டும். அதை விடுத்து பெண்கள் இதை அணியக் கூடாது, இதை இப்படி அணிய வேண்டும் என்று கலாச்சார கமிசார்கள் கூறுவதை பெண்கள் ஏன் ஏற்க வேண்டும். பிரச்சினையின் மூலம் மதம் சார்ந்த அவரது, அதாவது குருமூர்த்தியின் சிந்தனையில் உள்ளது. ஆதிசங்கரர் முதல் சின்மயானந்தா வரை இந்து மத தத்துவவாதிகளால் ஆண் பெண் சமத்துவத்துவத்தை முழுமையாக ஏற்க முடியாத போது குருமூர்த்தி மட்டும் விதிவிலக்காக இருப்பாரா. கிரிஜா இது போன்ற கேள்விகளை எழுப்பினால் பயனுள்ளதாக இருக்கும்.

குழந்தையிடம் ஒரு வேண்டுகோள்

2004-11-21T14:34:00.000-08:00

குழந்தையிடம் ஒரு வேண்டுகோள்

கனவில் வரும் கடவுள்
என்னதான் சொல்வாரோ
புரியுமோ புரியாதோ,
உன் புன்னகை அழகு அழகுதான்

செல்லமே, என் கனவில்
கடவுள் வருவதில்லை
ஏனென்று கேட்டுச்
சொல்வாயா
தூங்கும் போதாவது
என்னைக்
குழந்தையையாய்
மாற்றுவாரா
சொல்
புரிய வேண்டாம்
புன்னகைக்க முடிந்தால்
போதும்

{அமிர்த வர்ஷிணிக்கு அன்புடன்}

2006 நவமபர் 13 - கடைசிச் செய்திகள்

2004-11-13T05:31:00.000-08:00

திரையுலகம் நடத்திய பாராட்டு விழாவில் ரஜனி காந்த் உட்பட அனைவரும் முதல்வர் ஸ்டாலின்,துணை முதல்வர்கள் டாக்டர்.ராமதாஸ், ஜி.கே.வாசனைப் பாராட்டினார்கள். உடல் இங்கே உள்ளம் அங்கே என்று கலைஞர் கருணாநிதி அனுப்பியிருந்த கவிதையை அமைதியாக அனைவரும் கேட்டனர். நிகழ்ச்சியின் இறுதி வரை ஸ்டாலினும், இரு துணை முதல்வர்களும் இருந்தனர். நிகழ்ச்சியின் துவக்கத்தில் மூன்று நடிகைகளுக்கு தமிழ்ப் பெயர்களை ராமதாஸ் சூட்டினார். இது போல் நடிகர்களுக்கும் தூய தமிழ்ப் பெயர் சூட்டும் நிகழ்ச்சி விரைவில் நடைபெறும் என்றும் கூறினார். இது நடிக, நடிகையர் விருப்பத்தின் பெயரில் செய்யப்படுவதாகக் கூறினார்.
சோனாலி ஷா என்ற நடிகைக்கு தமிழ்த்தங்கம் என்ற பெயர் சூட்டுவதுடன் நிகழ்ச்சி துவங்கியது. சோனாலி என்ற பெயரில் வேறு சில நடிகைகளும் இருப்பதால் நடிக்கும் மொழிக்கு ஒரு பெயர் வைத்துக்கொள்வது தனக்கு வசதிதான் என்று அவர் குறிப்பிட்டார். மேலும் தன் முகத்தைப் பார்த்தாலே தான் யார் என்பதை ரசிகர்கள் அறிந்து கொள்ள முடியுமென்பதால் தனது வெவ்வேறு பெயர்களால் குழப்பம் வராது என்றார்.

ஸ்டாலினைப் பார்க்கும் போது கலைஞரைப் பார்ப்பது போலிருப்பபதாக குறிப்பிட்ட ரஜனி ஸ்டாலின் நடிக்க வராதது அரசியலுக்கு லாபம், திரையுலகிற்கு நஷ்டம் என்றார். ரஜனி தான் ஸ்டாலின் நடித்த தொலைக்காட்சித் தொடரை விரும்பிப் பார்த்தாக குறிப்பிட்டார். அவர் டாக்டர் ராமதாஸின் விடா முயற்சியையும், தைரியத்தினையும் பாராட்டினார். மேலும் வாசன் கருப்பையா மூப்பனாரின் கனவுகளை நிறைவேற்றுகிறார் என்றார். முன்னதாக திரையுலகின் சார்பில் ஒரு பெரிய மாலையை ரஜனி, கமல்,விஜயகாந்த, சரத் குமார் கூட்டாக ஸ்டாலினுக்கு அணிவித்தனர்.

கலைஞரின் பூம்புகார் படத்திலிருந்து கண்ணகி பேசும் வசனத்தை நடித்துக் காட்ட வந்த நடிகை அரைகுறை நடன உடையை மாற்றாமல் வந்து நடித்து காட்டத் துவங்கினார், உடனே தன் தவறை உணர்ந்து உடனே உடை மாற்றிக் கொண்டு வந்தார். அவருக்கு பிண்ணனி குரல் கொடுத்தவர் இந்தக் குழப்பத்தை அறியாததால் சிறிது நேரம் அவர் குரல் மட்டும் ஒலித்தது. பின் முதலிலிருந்து நடித்துக் காட்டினார்.

சத்யராஜ் நடித்த படப்பாடலை மாற்றி அமைத்து தாஸ் தாஸ் நீங்க இப்போ எங்க பாஸ் பாஸ் என்று நடிக நடிகையர் ஆடிய நடனத்தை ராமதாஸ் வெகுவாக ரசித்தார்.

(புகைப்படங்களுடன் முழு விபரங்களுக்கு 14 நவம்பர் 2006 நாளிதழைப் பார்க்கவும்)

பெண்ணியம்- எதற்காக இந்த வலைப்பதிவு

2004-11-12T03:32:00.000-08:00

பெண்ணிய சிந்தனைகள் எனக்கு மிகவும் பயனுள்ளவையாக இருந்துள்ளன,இருக்கின்றன. பெண்ணியவாதிகளிடமிருந்து பலவற்றை நான் கற்றுள்ளேன். என் பெண்ணிய நண்பர்கள் எனக்கு பல நூல்களை,விவாதங்களை, சிந்தனைப் போக்குகளை அறிமுகம் செய்ததுடன் என் புரிதலையும் ஆழப்படுத்தியுள்ளார்கள்.
இவ்வலைப்பதிவில் பெண்ணியம் தொடர்பான என் எண்ணங்கள், கவனத்திற்கு வந்த நூல்கள், செய்திக்குறிப்புகள், படித்த கட்டுரைகள், நூல்கள் பற்றிய குறிப்புகள், கட்டுரைகள் என்று பலவற்றை உங்கள் முன் வைக்க விரும்புகிறேன். நினைப்பதெல்லாம் நடப்பதில்லையாயினும், என் ஆசையில் 25 சதவீதம் நிறைவேறினால் கூட மகிழ்வேன். ஆம் பகிர்ந்து கொள்ள, தெரிவிக்க, எழுதுவதற்கு எவ்வளவோ உள்ளனவே.

வலைப்பதிவென்ற பெயரில் ஒரு அசிங்கம்

2004-11-11T02:56:00.000-08:00

திரு.சுந்தரராஜன் (மூக்கன்) தன் வலைப்பதிவில் எழுதியுள்ளவை ஆபாசமாகவும், ஒரு பெண்ணை இழிவுபடுத்துவதாகவும்உள்ளன. இதை நான் கண்டிக்கிறேன். கருத்துக் கூறிய ஆண்கள் இந்தப் பதிவினைக் கண்டிக்கவில்லை. வலைப்பதிவினை இப்படி பயன்படுத்துவது கண்டிக்கப்பட வேண்டியது. நாங்கள் ஆண்கள் பெண்களைப் பற்றி எப்படிவேண்டுமானாலும் எழுதுவோம் வர்ணிப்போம் என்ற வக்கிர மனப் பான்மையின் வெளிப்பாடு இது.

எல்லோருக்கும்

2004-11-10T22:33:00.000-08:00

அத்வானி, உமா பாரதி,
2 ஆண்டுகளாக பொடாவில் சிறையில்
இருக்கும்பெயில் கிடைக்காத
நக்சலைட்களுக்கும்
ஸ்ரீ கிருஷ்ண பரமாத்மாவிற்கும்
ஆண்ட,
ஆண்டு கொண்டிருக்கும்,
ஆளப் போகும்
நரகாசுரன்கள்,
நரகாசுரிகளுக்கும்
மற்றும்
அனைவருக்கும்
இனிய தீபாவளி
வாழ்த்துக்கள்

கவிதைகள் மூன்று

2004-11-07T09:06:00.000-08:00

உறை பனி வார்த்தைகள்

சொன்ன சொற்களில்
சில உறைபனிக்குள்
சிக்கி உறங்குகின்றன
வேறு சில இலையுதிர்கால
இலைகள் போல்உதிர்ந்து
எங்கோ போயின
மக்கின
இன்னும் சில என் மனதிற்குள்
நுழையவே இல்லை
வழியிலே தொலைந்து விட்டன
ஆயினும் சில
என்னுள் சூல்
கொண்டுள்ளன
வேறு சில நானறியாமல்
என்னுள் நம் சொற்களாயின
இரவுகளிலும் பகலிலும்
துணையாயின

இவற்றில் எதுஎதுவென
நீயறியாய்
நான்
சொன்னாலும்

மூன்று கடிகாரங்கள்

இதயத்தில் மூன்று கடிகாரங்கள்
உன் காலத்தினை உணர்த்த ஒன்று
என் காலத்தினை அறிய ஒன்று
என்றோ வரக்கூடும்
நம் காலத்திற்காக
இன்னொன்று

தேடல்
நினைவுகள் போதாத போது
குரலோ புகைப்படமோ
வேறெதற்கோ இட்டுச் செல்லும் போது
தேடுகிறேன்
உன் உடலை
நீயோ வேறொரு காலப்பிரதேசத்தில்
தினம் உன் உறக்கத்தினைக் கலைக்கும்
என் நெருப்பு மூச்சு
உன்னது என்னதை
கலைப்பது போல்

நித்யா

2004-11-04T22:50:00.000-08:00

நித்யா

டேய் இந்த உடையும்,தலையலங்காரமும்,பிண்ணனி இசையும் எப்படி என்றாள் நித்யா

திரையில் நித்யா வெவ்வேறு உடைகளில் வெவ்வேறு பிண்ணனி இசையில் ஆடிக் கொண்டிருந்தாள்.நடனமாடுவது ஆறு நிமிடங்கள், ஆனால் நான்கு விதமான உடைகள் நான்கு விதமான பிண்ணனி இசைகளிலிருந்து எனக்குப் பிடித்தது எதுவென்பதை தீர்மானிக்க ஒரு மணி நேரமாயிற்று.தெரியாது என்றால் விட மாட்டாள், வருங்கால மனைவியிடம் என்ன பேச முடியும்

ஆமாம் இந்த இசை சங்க காலத்திலிருந்ததா

அது தெரியாது ஆனால் எத்னோமியுசிக் ஆர்கவைஸ், குளோபல் மியுசிக் டாட்டாபேஸிலிருந்து இதைத் தேடிஎடுத்து போன நூற்றாண்டு ஆய்வுகளுடன் ஒப்பிட்டே இது பொருந்துமென முடிவு செய்தேன்

இந்த பாரு நித்யா எனக்கு சங்க கால இசை தெரியாது உன்னைத் தெரியும் உன்னைப் பிடிக்கும்அதனாலே அதையும் பிடிக்கும்

அது போதும், ஆனால் நீ பேசினது ஒரு கதையில் வருது ஐம்பது வருஷத்திற்கு முந்தி விசிதாஎழுதிய கதையில்

அதை எப்படிச் சொல்றே

முட்டாளே நீ பேசினதை உடனே பதிவு பண்ணி யாராவது அது மாதிரி எழுதியிருக்காங்களான்னுபார்க்க முடியும் என்னாலே, அந்த சிஸ்டம் இப்போ நீ சொல்றதை பதிவு பண்ணுது உடனே திரையில்காட்டுது பார்

அட, ஆமாம் , ஆனா முதல்ல அதை தூக்கி எறி, எதஎயெடுத்தாலும் ஆர்க்கவைஸில் தேடற புத்தியை கொஞ்சம் நாள் ஒதுக்கிவை.

சரி ஆனா அதற்கு இப்போதய விலை 50 முத்தம்

நித்யாவை நான் பார்த்தது ஒரு கலை நிகழ்ச்சியில். தோட்டத்தில் வேலை செய்து க¨ளைத்துவந்த போது என்னதான் நடக்கிறது ஊரில் என்று தேடிய போது வீட்டிற்கு எதிரே உள்ள அரங்கில்அவள் நடனமாடிக் கொண்டிருந்தாள் என்பதை வீட்டுத் திரைக் காட்டியது , அந்த அசைவுகள், அந்த கண்கள், அந்த கன்னம் வீட்டிலிருந்து பார்த்த பின் உடனே ஒடினேன் அரங்கிறகு. அப்புறம் அவளை நான் அங்கே நேரில் பார்த்து, கொஞ்சம் கொஞ்சமாக பழகி, அன்பை வெளிப்படுத்தி, பின் ஒரு நாள் காதலைச் சொன்ன பின், அடுத்த நாளே கூப்பிட்டவுடன் என்னுடன் வந்து தங்கிவிட்டாள். எனக்கும் காதல் வரும், ஒரு காதலி கிடைப்பாள் என்றெல்லாம் நான் எதிர்பார்க்கவில்லை. சில பெண்கள் வந்து போன என் வாழ்க்கையில் அவள் நிரந்தர வசந்தமானாள். எனக்கு பிடிச்சது தோட்டத்தில் செடி வளர்ப்பது, மலை ஏறுவது, பனிச் சறுக்கு இத்தியாதி. அவளுக்கு இசை, நடனம்,கவிதை போன்றவை. மாறுபடும் விருப்பங்கள் மாறாத காதல். அவள் காதலை அவள் பெற்றோர் ஏற்றனர். அவள் ஆய்வினை முடித்த பின் எங்கள் திருமணம் என்று தீர்மானித்தோம்.

அறையை ஒழுங்குபடுத்துவோம், ஒரு கை கொடு, அப்பாவுடன் பேசும் போது அறை சுத்தமாக இருக்கட்டும் என்றேன்.

அப்பாவுடன் பேசப்போறியா, நம்ம விஷயத்தைப் பத்தி என்று படபடத்து கேட்டவளிடம் ஆமாம், அக்காவும், தம்பியும் முடிஞ்சா சேர்ந்துக்குறோம்ன்னு சொன்னாங்கா என்றேன்

நான்

அடுத்த அறையிலிருந்து பார், நீ பார்ப்பது அவருக்கு தெரியாது

முகத்தினை கொஞ்சம் அழகு செய்து கொண்டு, அப்பாவிற்கு பிடித்த வாசனையை அறையில் உலவ விட்டேன், அறையின் பிண்ணனியை இளம் நீலத்திற்கு மாற்றினேன். பின் சுவர்த்திரையில் அப்பாவைஅழைத்த போது அங்கே வீட்டில் அப்பா, அம்மா. அப்பா சாய்வு நாற்காலியில், அம்மா ஊஞ்சலில். அப்பா கையிலிருந்து ரத்த அழுத்தம் சரியாக உள்ளது என்ற சமிக்ஞை வந்தது. எனக்கும் ஒரு நிம்மதி

என்ன எப்படி இருக்கே

நல்லாயிருக்கேன் அப்பா, உங்களின் படிப்பு எப்படி

அது பாட்டுக்கு போகுது, நேரம்தான் இல்லை, அம்மாவும் கூட படிக்கிறாளா, அவளைப்பார்க்கத்தான் தோணுது.

அப்பா ஒரு விஷயம் உங்கள்ட்ட

ஆமாம் கேள்விப்பட்டேன், அந்தப் பொண்ணு குரல்,வீடியோ கிளிப்பிங் பார்த்தேன், நல்லா டான்ஸ்ஆடறா, பாடறா,அந்தக் காலத்து ஐஸ்வர்யாவையும் இந்தக் காலத்து தன்யாவையும் நினைவுபடுத்தாறா, உங்க அம்மா கூட சின்ன வயசுல இந்த மாதிரியெல்லாம் ஆடியிருக்கா.இப்ப எங்க இருக்கா அவ

அவ ஹாஸ்டலில் நல்ல பொண்ணுப்பா, அவங்க வீட்டிலே சரின்னுட்டாங்கப்பா, இங்க யூனியன் டிபார்ட்மெண்டிலும் சரின்னு சொல்லிட்டாங்கா, இரண்டு பேர் உடம்பும் மாட்ச் ஆகுது, உங்க சம்மதம் மட்டும் வேணும்

அதெல்லாம் சரி, அந்த விஷயம் இடிக்குதே

அப்பா, இந்த காலத்தில் போய் அதெல்லாம் பார்த்தால்

பார்ப்பேன், நான் பார்ப்பேன், எவ்வளவோ விட்டுக் கொடுத்தாச்சு, இதில் முடியாது

சமிஞ்கை ரத்த அழுத்தம் கொஞ்சம் அதிகரிப்பதைக் காட்டியது,

அப்பா அக்கா செய்யாததையா நான் செஞ்சுட்டேன், அப்புறம் என்னப்பா

இல்லை, அவை அந்த விஷயத்தில் சரியாத்தான் செய்தாள், நீதான் முரண்டுபிடிக்கிற, தப்பு செய்திருக்க

அப்பா நித்யா நல்ல பொண்ணுப்பா, முதல் குழந்தையை ஆம்பளைக் குழந்தையா பெத்துக்கணும்அதுக்கு உங்க பேர் வைக்கணுமுன்னு ஆசைப்படறா, உங்க மேலே ரொம்ப மரியாதை உண்டு

அதெல்லாம் சரி, அந்த விஷயத்தில்தான் பிரச்சினை, பொண்ணு நல்ல பொண்ணு, நல்லா படிக்குது,உனக்கு ஒத்துப் போகும் ஆனா என்னால் அதில் விட்டே கொடுக்க முடியாது

சமிக்ஞை மஞ்சள் நிறத்தைக் காட்டியது

இல்லைப்பா, கல்யாணமே வேண்டாமென்று இருந்தேன், நித்யாவைப் பார்க்கிற வரைக்கும் எனக்குகல்யாணத்தில் , குடும்ப வாழ்க்கையில் விருப்பமில்லாமல் இருந்தேன் அது உங்களுக்கு தெரியாதா

இந்த பாரு, அதெல்லாம் எனக்கும் தெரியும், இந்த ஒன்றிற்குத்தான் யோசிக்கிறேன்,இதில் போய் எப்படி நான் விட்டுக்கொடுப்பேன், கொஞ்சம் யோசி, உனக்கு வேற பொண்ணாகிடைக்காது

இல்லைப்பா, அவளை என்னாலே கைவிடமுடியாது

சமிக்ஞயில் மாறுதல் இளம் சிவப்பின் துவக்கம்

அம்மா குறுக்கிட்டு சரி இதெல்லாம் அப்புறம் பேசலாம் என்றாள்

அப்பா கடைசியா ஒருதரம் கேட்கிறேம்ப்பா, எனக்கா என் ஆசைக்காக
இதுக்கு சம்மதிங்கப்பா

இளம் சிவப்பு கரும் சிவப்பாகவே அம்மா அப்பா கையில் அந்த இடத்தில் ஒரு சிறு கட்டியை வைத்தாள்

இதற்கு மேல் இப்போ பேசாதே, என்றபடி அம்மா துண்டித்தாள்

உண்மைதான் அப்பாவிற்கு இந்தப் பேச்செடுத்தால் ரத்த அழுத்தம் எகிறுது , இதைத்தான் அக்காவும்,தம்பியும் சொன்னார்கள்.

அடுத்த அறையில் நித்யா அழுது கொண்டிருந்தாள், அப்பா ஒத்துக்கவே மாட்டாரா, அப்படியானா நாமகல்யாணம் பண்ணிக்கவே முடியாதா

என் செல்லம், அப்படியில்லை, அவர் மனசை மாத்தலாம், கொஞ்சம் பொறு

அக்கா என்ன செய்தாள், எப்படி ஒத்துக்கிட்டார்,

ஐயோ உனக்குப் புரியல்ல, அப்பா காதலுக்கு எதிரியில்லை, அக்கா அதே ஜாதியில் காதலிச்சா அப்பா சரின்னார்

அப்போ நம்ம காதல் அவ்வளவுதானா

யார் சொன்னா, அப்பா சம்மதிக்கலைன்னாலும் இங்க கோயில்ல உனக்குத் தாலி கட்டி அப்புறம்இந்தியா போய் முறைப்படி கல்யாணம் பண்ணிக்கலாம்
சிரிப்பு பூத்த அவள் முகத்தை என் உதடுகளால் அளந்தேன்

சரி நான் கிளம்பறேன், இன்னும் அரை மணி நேரத்தில் அங்க இருக்கணும், நீ

நான் வீட்டிலிருந்தே வேலை செய்வேன், அப்புறம் டான்ஸ் ரிகர்சல், அந்த சங்கப்பாடல்டான்சிற்கு பாக்கிரவுண்ட் டிசைன் செய்ய வர்ச்சுவல் பீரியட் சிஸ்டத்தில் கொஞ்ச நேரம்வேலை பண்ணுவேன், வீட்டிலிருந்தே சிமுலேஷன் செய்வேன், நீ வந்தப்புறம் வீட்டில்இறுதி ரிகர்சல்

செய், உன்னைவிட்டா யாருக்கு இதெல்லாம் இன்னிக்குத் தெரியும்

அப்போதுதான் நினைவிற்கு வந்தது இன்று விசேஷ ஆடை அணிவது உசிதமென்று, அதைத்அணிந்த பின் உடலுள்செலுத்தியை(இம்பிளாண்டை)த் தேடினேன், போன மாதம் வாங்கியது தீர்ந்து விட்டிருந்தது.

நித்யா

என்ன டார்லிங்

உன் இம்பிளாண்ட் மூணு கொடு, மறக்காமால இந்த மாசம் கொஞ்சம் அதிகமாக வாங்கி வை,

இந்தா, ஆறு எதற்கும் வைச்சுக்கோ

கையில் செருகிக்கொண்டேன், ரத்த ஒழுக்கை இது குறைக்கும், வலி இருக்காது, முக்கியமா உடம்பு சோர்வதை சரி செய்யும் , இன்னும் மூன்று, நான்கு நாட்களுக்கு அந்தத் தொல்லையை சகித்து கொள்ள வேண்டும், மாதாமாதம் இதே தொல்லை, இதை இல்லாமல் செய்யவே முடியாதா,அம்மா காலத்திலிருந்து முயற்சி பண்றாங்க, இன்னும் தீர்க்க முடியலையே என்று நினைத்தபடி வெளியேறினேன்.

Published in Thinnai Nov 04 2004

புஷ் வெற்றி

2004-11-03T10:04:00.000-08:00

இதனை நான் எழுதும் போது புஷ் வெற்றி உறுதி அல்லது வெற்றி பெற்றுவிட்டார் என்றே செய்திகள் சொல்கின்றன. இனி என்ன நடக்குமோ , ஒரு வேளை இரான் மீது தாக்குதலை துவக்கி இரண்டாவது முறையாக ஆட்சியைத் துவக்கலாம். அல்லது தீவிரவாதத்தினை முற்றாக ஒழிக்கும் வரை நானே அதிபர் என்று சட்டத் திருத்தம் கொண்டு வர முயற்சிக்கலாம். அமெரிக்காவை புஷ் சரியான பாதையில் இட்டுச் செல்வார் என்று எனக்கு நம்பிக்கையில்லை. ஈராக் படையெடுப்பினை இந்தத் தேர்தல் மூலம் அமெரிக்கர்கள் ஏற்றுக் கொண்டு, அது சரி என்றே ஒட்டளித்துள்ளார்கள் என்றுதான் கொள்ள வேண்டும். இஸ்லாமிய அடிப்படைவாததிற்கும், கிறிஸ்துவ அடிப்படை வாதத்திற்கும் இதன் மூலம் புது சக்தி கிடைத்துள்ளது. இது உலகிறகு நல்லதல்ல.

முன்னோட்டம்

2004-10-30T15:04:00.000-07:00

வரும் வியாழன் இரவு அல்லது வெள்ளி காலை ஒரு சிறுகதையை இவ்வலைப்பதிவில் இடுகிறேன். ஒரு மாறுபட்ட காதல் கதை என்று அதைச் சொல்லாம். ஆனால் அதை படித்தபின் அது காதல் கதை மட்டும்தான் என்று நீங்கள் சொல்லமாட்டீர்கள்.

முதல் வணக்கம்

2004-10-30T11:28:00.000-07:00

இப்பதிவு சோதனைக்காக, உங்களை சோதிக்க அல்ல.விரைவில் ஒரு சிறுகதையுடன் சந்திக்கிறேன். அன்பு வணக்கம் கூறி விடை பெறுவது விசிதா